Marmari á vatni

Marmari á vatni (e. marbling) á rætur að rekja til austur asíu en aðferðina má finna í sögu ýmissa landa þvert á asíu og evrópu. Til eru mismunandi útgáfur af aðferðinni en í grunninn er hún svipuð. Í þessu verkefni prufa nemendur japanska marmaragerð sem kallast suminagashi en það er ein einfaldasta útgáfa marmara á vatni.

Þá er vatn sett í bakka og blek látið ofan á vatnsyfirborðið, annað hvort með pensli eða á sérstaka pappadoppu sem hindrar blekið í að sökkva undir vatnsyfirborðið. Síðan má nota vatn með örlítilli sápu til þess að búa til hringi í blekið þar sem sápan hrindir blekinu frá sér. Að þessu loknu er pappírsörk lögð ofan á vatnsyfirborðið sem dregur í sig blekið og er síðan lögð til þerris.